Scene-1

(Lucknow ka ek sunsan road, bougainvillea ke ped ke pas , Deepak (30) sharab ke nashe me
hai, uska sharir itna hil raha hai ki pata chal raha hai wo apne phone ko kahin rakh kar dance
(reel)video bana raha hai .. gana “niche paan ki dukaan upar julie ka makaan” sunai pad raha
hai , usi frame me ek bike uske piche se nikalte hui aur 1 kuch hi second me wapas akar uske
pas khadi hoti hai .. bike ek ladki chala rahi hai jiska naam preeti hai wo deepak se puchte hai )

Preeti- Deepak naam se apne ride book ki thi .?

Deepak- ( dance karte hue rukta hai jaise kisi ne uski chori pakad li ho , thoda confuse hai ki
ladki bike se aayi hai )
Han…. Par aap rider hai ? (Apne phone me booking details dekhta hai ) Preeti Tiwari .. are ..

Preeti- Bhaiya aapne drink kia hai kya ?

Deepak- (confuse ha ) Han … vo… main ye ride cancel kar ke dusri book kar leta hu , sorry
itni door aayi aap ..

Preeti- are cancel kyu karni hai ? Weekend pe to itna chalta hai bhaiya aiye baithiye ..

Deepak- aap comfortable rahegi? (Confused)

Preeti- aapka itna puchna hi bahut hai , baki mera ye roz ka kaam hai .. OTP bataiye .

Deepak- 3570

(Deepak bike pe baithne ki koshish kar raha hai par nashe ke karan wo baith nahi pata uske
pas uska ek bag bhi hai )

Preeti - laiye bag mujhe de dijiye ..

(Preeti deepak se uska bag leti hai aur deepak ko baitha kar frame se bahar nikal jati hai )

Scene -2

(Road sunsaan hai bike chal rahi hai )

Preeti- Bhaiya agar apko dikkat ho rahi ho to kandhe pe hath rakh sakte hai mere .

Deepak- are nahi thik hai , kya bat hai .. aap to bahut hi balance bike chala rahi hai .

Preeti- do sal se 6-6 ghante chala rahe hai bhaiya adat pad gai hai .
Deepak- ghar wale kaise maan gaye aapke is job ke lie ?

Preeti- manana hi pada bhaiya jab papa nahi rahe .. ghar me sirf mummy dadi aur chhoti
bahen h..

Deepak- sorry … (pause). Waise hua kya tha apke pita ji ko ?

Preeti- sharan bahut pite the bhaiya , Bimar the phir ek din bimari jeet gai …bank se.
Loan woan bhi le lie the thoda bahut wahi khtm karne ka sangharsh chal raha h ..

Deepak- sangharh kya yahi to jeevan hai , par itni raat me bike chala rahi hai din bhi to
hai ?

Preeti- ab raat me ladkiya sadak par nahi niklengi to sadak ladko ki nahi ho jaygi? (Pause
ke bad jor se hasti hai ) mazaak kar rahe the bhaiya ..
Lucknow university se padhai bhi chal rahi hai BA second year hai mera hindi literature
me.. to din college me nikal jata h.

Deepak- oh acha , gadi rokiye gadi rokiye (oolti ati hai)

Scene -3

( deepak oolti kar raha ha aur preeti use paani ka bottle de rahi hai )

Preeti- extra charge lagega bhaiya is seva ka (bottle dete hue)

Deepak- (Preeti ko dekhta h)

Preeti- are mazaak kar rae the , kya piye the?

Deepak- old monk (oolti karte hue)

Preeti- agar apko dikkat na ho to pith sahla du?(baithkar deepak ke pass)

Deepak- hmm..

Preeti- ab to garmi aa gai h beer pina chhaiye tha..

Deepak- aap bhi drink karti hai ?

Preeti- nahi bhaiya pite to nahi par pata sab hai ,wo dost log meri piti hai na hum
coldrink leke unke sath baithte h to her brand malum h.
Aap her weekend pite hai?

(Dono khade hote hai )

Deepak-
Nahi jis din doston ko desh ki economy sahi karne ki chinta hoti us din pi lete hai .. chale
?

Preeti- han chaliye chaliye waiting charge bhi badh raha hoga apka , nahi to baad me
kahenge dikha itna raha tha itna kaise aa gaaya..

Scene 4

(Bike phir se road pe chal rahi hai )

Deepak - bike chala ke manage ho jata hai? ghar ka aur aapka kharcha?

Preeti - college jane se pahle subh tuition bhi padhati hu bhaiya aur mummy gaon me
silai bhi karti hai to manage ho jata hai.

Deepak - accha…(pause) hume lagta tha ladke paise kamate hai to poore parivaar ka wo
paisa hota hai aur ladkiyan kamati hai to sirf unka.

Preeti - aise humko bhi lagta tha bhaiya ki har mard ek jaise hote hai par raat me jab se
bike chalana shuru kiye tab samajh me aaya ki hum galat the. Sara khel experience hai h
bhaiya ..

Deepak -haa ye to hai (pause) waise aadmiyon ko bhi dar lagta hai raat me akele travel
karne par, upar se main drink bhi kiya hoon to aur dara tha par aaj pehli baar safe feel kar
raha hoon aapke saath, ki chalo ghar to aaram se pahunch jaunga.

Preeti - bas aise hi ladkiyan bhi feel karne lage bhaiya to maza hi aa jaye, kya bolte hai.(
excitement me)

Deepak - ye to hai…

(Kutte bhaukte hai gaadi ka picha karte hai )

Deepak - kutto se dar nahi lagta raat me?

Preeti - na, ek simple funda hai bhaiya, kutte jab dikhe unse aankh mat churao, unki
aankhon me ghoor ke dekho jaise aap nahi wo khud aapka shikar ho, peecha nahi
karenge fir. ek do haraami hote hai par manage ho jata hai.

Deepak - ek teer se do nishana maara hai aapne to.

Preeti - kabhi kabhi aise bahut bhayankar baat bol deti hoon bhaiya, meri friends bhi
kehti hai.

Deepak - (hansate hue) accha, (pause )

raat me Lucknow sundar to lagta hai pahli bar notice kar raha hu ya nashe me lag raha
hai samajh nahi paa raha.

Preeti - are bilkul sundar lagta hai malik, aapko pata hai college me meri bahut saari
friends hai jinhone dekha hi nahi ki raat me unka shehar kaisa lagta hai.

Deepak - kyu raat me unko dikhai nahi deta?

Preeti - (hansate hue) hahaha

Deepak - sorry, aap ki tarh mazak kar raha tha, pata hai ghar parivaar ki restriction rehti
hai.

Preeti - are chil samajh gaye the bhaiya, khair ye sab samajik baate chhodiye aap dance
reel banate hai kya?

Deepak - (shock ,kuch der pause ke bad)

are wo to aise hi kabhi kabhi bana lete hai par kahin upload nahi karte

(kuch der ka pause)

darasal hum dancer banna chahte the.

Preeti - chahte the? to abhi kya hai?

Deepak - abhi to library assistant hai.

Preeti - to bane kyu nahi?

Deepak - ghar ke bade ladke hai na.

Preeti - oh sad life…

(Dono haste hai )

Deepak- par hamari chhoti bahen hai usko film line me jana hai director banana hai ,
uska sapna marne nahi dege ye pakki baat h..

Preeti- ye hui mardon wali baat .. lijiye apke location par Pahuch gaye ..

(Deepak utar ke bag leta hai aur 50rs ka note deta h)

Deepak- payment online ho gaya hoga , par ye lo (note dete hue) tip hamari chhoti bahen
ke lie .. chalo khayal rakhna apna aur ghar ka

(Paisa dekar deepak jane lagta hai preeti bike start karti hai )

Preeti- bhaiya ..

Deepak- han ? (Palat kar )

Preeti- bhaiya log kya kahenge is dar se khud ko rokiye mat ,apni dance videos upload
kia kariye ..sune hai kalakar ka koi umra thodi hota hai chaliye good night ( bike start kar
ke nikal jati h)

Deepak- good night ( muskurata hai )

(Back shot preeti bike leke jaa rahi hai aur credit ata h)